Monday, October 22, 2007

سيبنا من الفكر شوية



سيبنا من الفكر شوية وخلونا نكتب احسن كلمتين ساعات من كتر ما بنحسبها وبنخاف

بنضيع أجمل ما فينا ولينا
وبنبقي عرفين أن الدنيا بتجري وبنسيب الخيوط كلها من ايدينا بحجة نفسيه بجحة وملتويه

وهي اننا بنحاول نجمع البكرة كلها

والبكرة اللي هيا الحياة

ولا احنا في دماغها خالص

خليك بقي خايف أو خليك كداب او تكون مع نفسك أو مش شايف نفسك خالص أهو كله برتقال
أو عايش متلخبط مش فاهم الحدوته اللي محدش شايف تفاصيلها غيرك
الحدوته اللي أنت بطلها ومخرجها بلغة البوست بكرتك
واللي تحيرة البكرة بتاعته مش هيفرق كتير عن ناس جت ومشت من البكرة الكبيرة وكله بيساوي

صفر
حتي لو الصفر في دمه الكدب ويبان مش صفر

في شكل مظاهر دين أو اوبشن دنيا

أكيد هيبان فقر الكدب في زمن كتر به الكدب

خايف اكون أكبر كداب وجبان

أه لو كنت أميره إنجليزيه أجيد فن الكروشية وأبويا لورد بسيف عمره ما شاف غمد

نطلع من التأثر بقصص الادب العالمي ونكمل البوست
ونوصل للإختيار الاخير

لحظه مش هكمل بوستات

ايه اختيار أخير دي مفيش اختيار أخير غير جوا المثلث الممل النمطي الكئيب لكن اللي بيخرج بره بيكون عنده اختيارات وبدائل كتير

طيب مفهوم ايوة مفهوم سيبينا نكمل بقي ونقول
إلحق نفسك سلم أمسك أجبر كسرك حس بأهلك أتونس بربك وسيبهاله بدقيق توكل قلبك عليه
ببساطه عيشها زي ما هيا
حبك قوي
كون أحلي حاجة في حياتك وحياة الناس
خليها تيجي وقت ما تيجي بالتيجي بيه
عجبك ولا ما عجبكش عيش من غير دوشه نفسيه وصراعات
في مرحله للتفكير والتحليل وفي مرحلة للحمورية
خليك متستف وخفيف علي نفسك وعلي ناسك

49 comments:

Anonymous said...

بصرف النظر ان انا مقرتش البوست

بس البوست رائع من العنوان

وبقول ان انا رجعت لعالم البلوجات وفى بوست

جدييييييييييييييد

وبسلم على عم حلاوة وعاشق الى بدع امبارح

يلا مش عايز اطول علشان الوقت السمين بتاعى


سلالالالالالالالالالالالالالام

sakayar said...

من كتر ما بنحسبها وبنخاف


بنضيع أجمل ما فينا ولينا
والبكرة اللي هيا الحياة ... نسيتي تقوللي لما تصحى م النووووم
عاجبني أوي أوي أوي البوست ... كنت هكتب حاجة زي كده بجد عندي ... بس فيه كذا فكرة أكتب بيها فبقيت محتااااار ... السكاياااار
اوعي تعملي زي الواد حلاوة وتقوليلي هوه انت ف ايه ولا ف ايه
بجد ... انا تقريبا بنفذ الكلام اللي كنت بقوله زمان .. بنفذه عملي ... واللي انتي كتبتيه في البوست ... اجمل ضجكة صافية ... أجمل حب لكل الناس ولرب كل الناس ... نوكل وصبر ويقين ... ولسه شايف قلبي نووووووور
بس لازم أنا اللي أدور على النور المرة دي .. مش أستناه يجيلي
عايز أكتب كتيييير أوي خصوصا اني مش علقت المرة اللي فاتت .... بس خايف الكومنت مش يكون مسنود كويس يقع على اللي بعدي
يا رب تكونوا تمام .... شكرااااااا على دعواتكم ...عارف والله انكم بتخلصولي في الدعاء... وانا كمان والله في التلت الاخير دايما بدعيلكم بالاسم

WhItE HeArT said...

ايه البوست الرائع اللي كله تقلبات ده

شوية ادب عالمي وشوية حتة البكرة الغريبة والخيوط الاغرب اللي معيشانا فيها ده حتى الرياضه معتقتيهاش

بس فعلا الببوست ده رجعني لأول بوست انتي كتبتيه وعجبتني اوي الحته اللي بتقولي فيها

إلحق نفسك سلم أمسك أجبر كسرك حس بأهلك أتونس بربك وسيبهاله بدقيق توكل قلبك عليه

بتفكرني بأعلان ابوتريكه بتاع الحق نفسك ومش عارف ايه ومتضبيعش الفرصه

لا بس بجد بوست جميل

الخيط الرفيع said...

ايه دا يا ولد
ايه البلتجة دي
كتبته ونزلت جري علي الدرس بس اما تيجي
داخل وعملي مجال وبتكلم الناس وكمان ما قريتش
وقتك السمين
والله اللي حصلك بعد راس البر كتييييييييييييير

مؤمنه said...

السلام عليكم ورحمة الله وبركاته
تيجى نسبنا من التفكير شويه ونعملها بساطه
ماهى الحياه كلها فى الاول والاخر هتنتهى بمنتهى البساطه
فعلى ايه هناخدها بالاجه
تعالى نعيش ببساطه
فكره جميله احيكى عليها
والسلام عليكم ورحمة الله وبركاته

تامر حسين said...

ياريت تتكرر الزياره ديما وموضوعك غايه في الجمال
تحياتي

الخيط الرفيع said...

سكايار عندنا يادي النور فينك منذ امد
دي اقل حاجة عندي كتاباتي فوق من الرائعة دايما
بس سيبنا من كتاباتي وورينا كتاباتك وطلع كل حاجة جواك علشان ترتاح وعلشان نتعلم لانك سابق الناس بمرحلة
بجد مش زحمة مجاملات اكيد عندك تجربه وخبره في بلاد الغربه وهتشوف الدنيا هناك بدماغ قريبه من الناس
ممكن تكون مش تمام او تكون تمام
مش هسأل بس هقول سطر من كتاباتك

لازم أنا اللي أدور على النور المرة دي .. مش أستناه يجيلي
هي دي زتونة المرحلة
شد حيلك
ربنا يسلم لك حالك
مهما كان خليك اد الحياة
بعد قرايتي للتاج شفت فيه شئ اعمق من الهزار والتفاريح
ربنا يهون عليك

الخيط الرفيع said...

اهلا يا وايت والله حقيقي الواحد مقصر في سؤاله عليك بس اكيد سيادتك عارف الظروف
واكيد طبعا رياضه ومثلثات وادب عالمي وخيوط عنكبوت ربنا ما يحرمك من كرمي
شكرا وانا كمان بحب النوعية دي من الكتابه
خلي بالك من دراستك ومن دراسه الدكتور صاحبك
ربنا يكرمكم وينور طريقكم ويحفظكم

الخيط الرفيع said...

مؤمنه
منورة دايما
وفي اغنية اسمها البساطة البساطة
يا عيني علي البساطة
فكيها يا مولاتي شويه واحلمي لنفسك شويتين وسيبي الباقي علي ربنا

الخيط الرفيع said...

تامر
ايوه مش هغيب تاني انا ليقتني كدا من شهرين ثلاثه معديتش قولت اعدي اشوف الجديد وكالعادة في جديد
شكرا ويارب يكون جميل ومفيد
تحياتي لحضرتك

حياة الأحلام said...

السلام عليكم
أنتى وحشتينى أكتر يا قمر

كلامك صح وجميل وفعلا الحياة زى بكره الخيط
ومرحله فى دايره أما نلف حوالين نفسنا أما ندور على مخرج ونخرج منها بسلام

عموما كتر التفكير هو اللى متعب أحسن حاجه نعيش الحياة ببساطه نعيش كل لحظه كأنها أخر لحظه فى حياتنا بحب ربنا وأهلنا والحياة لان لو دورنا على الوحش فى الدنيا يبقى مش هنعرف نعيش

تحياتى يا قمر

الخيط الرفيع said...

حياة الاحلام
منوراني
فعلا ما في اجمل من البساطه
بس مهم تبقي بسيط وفاهم ومركز مش عبيييييييييط
لعل التوازن هو الاسلم في كل شئ

dr.Roufy said...

ايه البوست العالى دا ياروفي

بجد مميز

الخيط الرفيع said...

يا هلا يا روفي الحمد لله انه عجبك
مميز وعالي
تشكراااااااااااااااات

soka said...

السلام عليكم
ازيك؟
اكيد بوست جميل
يمكن مافهمتش منه شويه بس مش كتير وده لأنى تعبانه حبتين ومش مركزه فامحبتش استنى لما اخف عشان ارد بس ان شاء الله ارد عليكى تانى لما اخف
ادعيلى بقى
سلام ياقمر

الخيط الرفيع said...

الف سلامه عليكي يا سوكا
لو عايزة درس خصوصي انا موجودة
وهستني تعليقك يا قمر

Anonymous said...

تعرفي فعلا احلى اوقات بيمر بيها الانسان لما بيسيبها كده من غير حسابات حبتها ولا محبتهاش هي الدنيا ولازم تتعاش

همسة قلم said...

عارفة يارورو

لما بتكلم مع ماما في الموضوع ده بالطريقة دي تقوللي ايه

ياأسماء عيشي اللحظة دي بس اتقي الله وانتي بتعشيها ومش تشيلي هم بكرة

الحياة كده

قصدي البكرة كده :)

اشوفك على خير ياقمر

الخيط الرفيع said...

حبتها ولا محبتهاش لازم تتعاش
بس بمزاج عالي
بما ان هي دي حياتنا فنحبها ونعمل فيها اللي احنا عاوزينو
بتوازن لا الفكر ياخدنا بمثاليته عن الواقع ولا نكون حبيسين للمتاح
دا كان قصدي نورتيني

الخيط الرفيع said...

همسة عندنا يا مرحبا
هي طنت كدا دايما مغرقاكي تجارب وبالمعلقة ربنا يكرمها ويحفظها
وتمام يا فندم لازم تتعاش

Eman Eltaher said...

كلام جميييييييل
صحيح فيه غموض
بس انا قدها و قدود :)
هههههههه
عايزين م البوستات دى كتير
و الى الأمام دايما يا قمر

تحياتى

الخيط الرفيع said...

ايمي يا هلا
غموض ايه بس يا بنتي
هو انتو كدا دايما بتكروتو وترجعوا تقولوا ما فهمناش
عيدي مع نفسك تاني بهدوء
وعندي كل طلباتك من عويناتي يا قمر

انحلت سيور العربه وسقط المهر من الاعياء said...

السلام عليكم

ازيك عامله ايه؟
كل سنه وانت طيبه متاخره
معلش
...............

فعلا عندك حقك الواحد يعيش شويه فى الطر اوه تحت التوته بتاعة الغيط ويشتر ى دماغه احسن

تحياتى

الخيط الرفيع said...

وعليكم السلام ورحمة الله وبركاته
وحضرتك بألف خير
بس انا ما اقصدش كدا خالص
انا اقصد بعد ما تتهري من التفكير والتخطيط والتنفيذ روح عن نفسك وحس بقيمة وجودك في الحياة
ومع كدا خلي كل خطوة ليها طعم مش علقة ولازم نأخد منها نصيبنا

بس التوته والشجرة وجو الاسترخاء دا لو بتعملو يا بختك بيه
لللللللللللللللا تحسد
بجد نورتني

ahmed mefrh said...

يعنى نخلينا كده عايشين و خلاص
و مش فى دمغنا يعنى

ازاى دة لازم تفكير و شغل بس المشكله انك تخلى التفكير يلجمك

تحياتى اليكم
ابو مفراح

الخيط الرفيع said...

أبو مفراح
اهلا بيك عندنا
انا اتفق معاك ما نخليش التفكير يلجمنا ولا يعكر صفو حياتنا
وقصدي نعمله بحرفية وذكاء
نلعبها صح
بجد نورتني كتير

Wish I were a Butterfly ... said...

عندك حق أوي... و شكرا بجد أوي :)

محتاجة البوست دة دلوقتي جامد

عجبني أوي كلامك و الأسلوب اللي زي ماعقلنا بيفكر كدة رايح جاي و ملخبط.. مش ثابتة على حاجة. بجد احنا بنفكر كدة،ـ و حاسة انك كسرتي الملل جامد اوي بالنقلات اللي بتعمليها في البوست دي :)

عجبني اوي "كون أحلى حاجة في حياتك و حياة الناس" . فعلا دي أهم حاجة في الدنيا

تحياتي على الكتابة المتميزة جدا يا جميل

تامر حسين said...

جميييييييييل موت
في موضوع جديد مستنيكوم

الخيط الرفيع said...

حبوبتي
انا طول عمري بكسر مللك وبرسم البسمة علي شفيفك اول ما ادخل من الباب
انا مبسوطة قوي انك مبسوطة
والحمد لله انه جه في وقته
وشكرا ليكي منوراني

الخيط الرفيع said...

اوك يا تامر

المهـ إلي الله ـاجر said...

السلام عليكم

فعلاً أختنا الفاضلة .. فهناك من الناس من يحاول أن يحيا الحياة كلها في يوم أو يومين .. ونسي ان الحبيب أمرنا بان نعتني بيومنا فهو المستقبل الحقيقي. فإن التعلق بالآتي والتباكي علي الماضي يضيع من طعم الحاضر الذي نعيشه

جزاك الله خيرا

•«ρяoιd»•™ said...

انتي جبتي من الآخر

احنا عباره عن صفر

تحياتي

الخيط الرفيع said...

المهاجر الي الله
اهلا بيك صاحب بلوج
ومنور في اول زيارة ليك
وحقيقي أضفت بهذه العبارة

التعلق بالآتي والتباكي علي الماضي يضيع من طعم الحاضر الذي نعيشه

صدق الحبيب علية الصلاة والسلام
وجزاك الله مثله

الخيط الرفيع said...

يا هلا يا برويد منورنا
فينك من زمان
علي العموم لعل المانع خير وما تتأخرش تاني
ايه جو انا جبت من الاخر وكلنا اصفار
لا لا لا ريلكس شويه
ونحاول نجدد ونتجدد والاصفار ممكن تبقي واحد وكمان مليون بس خطوة خطوة
وانا كنت اقصد نوازن بين جلد النفس والانجراف في التفكير
وبين احساسنا بطعم الحياة

Anonymous said...

ايه الجديد فين يافندم

Anonymous said...

بنضيع أجمل ما فينا ولينا
وبنبقي عرفين أن الدنيا بتجري وبنسيب الخيوط كلها من ايدينا بحجة نفسيه بجحة وملتويه

مش كدة برضو والله أنا طول عمري بقول كدة -مش بالأسلوب الرائع ده طبعا- بس للأسف عمر ما حد فهمني
ع العموم هي دي فلسفتي في الحياة واللي مش عاجبه مش مهم أن هقضيها لوحدي

بوست هايل والمدونة كلها تجنن
تحياتي

Ert3ashat said...

عندك حق والله

انا بتعجبني ارائك و كتابات اوي
بجد ماشاء الله و اسلوبك في التعبير بسيط و في الجون زي ما بيقولوا...

الخيط الرفيع said...

قلوب حائرة الجديد النهاردة بالليل وبالكتتتتتتتتتتتتتتتير بكرة
شرفونا تجدوا ما يسركم

الخيط الرفيع said...

عمر بلاطة
يا اهلا يا اهلا
زيارتك الاولي ويارب ما تحرمنا من خلاصة دماغك
طول عمرك بتقول كدا ومش لاقي حد يقول معاك
يبقي غيرهم او سيبهم وزود عليهم ناس تفتحلك الحياة
ولا تيأس من النضارة السودا اللي هتلاقي 90%من الشعب المصري بيرتديها
طنش خالص وعيش بدماغك لو مقتنع
وبجد شكرا علي شكرك في الاسلوب وفي المدونه حاجة بتسعدني جدا
هنستناك علي طول ضيف او صاحب مكان
نورتني
لو عندك بلوج سيبلي اللينك

الخيط الرفيع said...

ارتعاشات صديق البرنامج موجود عندنا بس انا زعلانه بعد البوست باسبوع كتتتتتتتتتتتتتتير
شهاده الواحد يعتز بيها حقيقي
بس يعني رأيك اشتغل في الصحافة هجيب فلوس

Romantica said...

السلام عليكم ورحمة الله وبركاته
انا اسف والله على التقصير في الرد بس انا اعتقد ان حضرتك مقدرة الظروف اللي انا فيها
وبوستاتي اللي انا بانزلها اختي الكبيرة اللي بتكتبها على الكومبيوتر

طبعا الاسلوب مش محتاج اني اتكلم عنه لان الفلسفة بقت سمة مميزة من سمات كتابات الخيط الرفيع

بس الحياة دلوقت لازم نحسب لكل خطوة فعلا والا الانسان هيغرق لو معملش كدة
ولو النسان فضل يجمع كل خيط يمر عليه في حياته هيعدي العمر وهو واقف في مكانه بلا ادنى حركة
ومش معنى كدة ان الانسان يخاف او يكدب لا هو ياخد بالاسباب فقط ويتجاهل اي معوقات ممكن توقفه في طريقه


طبعا كل اللي انا باقوله كلام فارغ انا رايي الشخصي بيقول ان الانسان يعيش حياته بالطول والعرض في حدود الحلال طبعا ويستمتع بكل ثانية في حياته ويحب الناس ويحب نفسه وان تضيع الوقت في سبيل اسعاد الشخص ليس تضييعا للوقت
وان لو الانسان خرج من حياتة بالسعادة وخمسمية جنية يبقى كفاية قوي

والبوست ده جه في وقته انا رميت الكتب اهه وقلت تيجي زي ماتيجي وطلعت قعدت جنب امي علشان ابقى احلى حاجه في حياتها
--------------------
بجد كلامك خلاني اعيد النظر في بعض الامور فعلا


البوست رائع


انا علقت اهه انا مستني تعليقك عندي

تحياتي

Romantica said...

بس ايه اللي جاب فن الكروشية واللورد اللي عنده سيف مشافش الغمد

Wish I were a Butterfly ... said...

كان يا مكان.. كان فيه بنت جميلة.. قالت في يوم من الايام :) "سيبنا من الفكر شوية" و من ساعتها... و محدش سمع عنها تاني!!! ياترى البنت دي.. قررت متفكرش تاني فكيرة حلوة كدة و تكتبها لجمهورها اللي بيحب كلامها اوي؟

منتظرين الجديد يا جميل :)

الخيط الرفيع said...

رومانتيك
خطوة عزيزة ايوة طبعا لازم تيجي وماتقصرش خالص مهما كان وراك وبالذات في البوستات اللي من النوع
وانا ما قولتش تسيب الكتب
ويارب تكون اعادة النظر ايجابية
سلامنا لطنت واختك
..............
موضوع القصص والسيف والغمد قصة طويله ممكن ابقي احكيها بعدين
ربنا معاك واسفة علي الخمس دقائق دول
شد حيلك ربنا يجعل يوم السبت يوم من ايام سعدك ورزقك في الدرجات

الخيط الرفيع said...

كان يا مكان.. كان فيه بنت جميلة.. قالت في يوم من الايام :) "سيبنا من الفكر شوية" و من ساعتها... و محدش سمع عنها تاني!!! ياترى البنت دي.. قررت متفكرش تاني فكيرة حلوة كدة و تكتبها لجمهورها اللي بيحب كلامها اوي

كان يا مكان يا سعد يا اكرام ولا يحلي الكلام غير بذكر النبي والقعدة مع الناس الجميله قوي الحنونه خالص اللي دخلوا حياتي في وقتهم بالظبط
حاضر مش هسيبنامن الفكر
بس يا افترية انا ما ببطلش فكر معاكي ليف ووجعة دماغك خالص

بجد سوري
علي الخروجة اللي ضيعتها بس اكيد هتتعوض

رينـــــــــــا said...

السلام عليكم
بوست رائع جدا...تعرفى فعلا الحياه متستاهلش غير اننا نعيشها ببساطه
لانها ابسط من اننا نعقدها
تسلم ايدك يا قمر

الخيط الرفيع said...

رينا
يادي الأنوار اللي هلت علي البلوج بتشريف حلم ليله صيف

اتفق معاكي في كومنتك واتفق معايا في بوستي
اننا ما نعقدهاش وتيجي وقت ما تيجي بالتيجي بيه بفرح او يزعل
لا يغرنا ولا يكسرنا
نفضل احنا مهما صب علينا الزمن صبغه سودا

abo salah said...

بعد السلام عليكم

ازيك ياذات الخيوط الرفيعة ؟
يارب تكوني بخير
ان عارف اني اكيد مزعلك بسبب تقصيري
بس اعذريني بقي عشان ظروف خارجة عن ايدي

البوست رائع جدا
دي خيوطك طلعت مش رفيعة بس .. دا كمان خيوط فلسفية

التفكير فعلا بيمثل قيد علينا
بس احيانا القيد ده يكون افضل ماأننا نتحرر منه

إلحق نفسك سلم أمسك أجبر كسرك حس
بأهلك أتونس بربك وسيبهاله بدقيق

جميلة اوي الجملة دي
فعلا لازم نشعر بقيمة وجودنا في الحياة

علي فكرة
اكتر حاجة اسعدتني النهاردة
هيا اضافة مدونتي المتواضعة في قائمة مفضلاتك
دي ثقة اشكرك عليها

تحياتي ليكي
واوعي تكوني لسه زعلانة

الخيط الرفيع said...

ابو صلاح
ابدا ابدا إطلاقا مطلقا مفيش زعل ولا حاجة
يارب تكون ماشي كويس في مشروع التخرج ربنا ييسر ليك أمرك
وأكيد في قيود ما بنحبش نتحرر منها
لانها بتوفر لينا الوجود بشكل أفضل
او الوقوف علي اراضي صلبه
والتفكير بيزبط زوايا الدماغ
نورتني