رئيس جمهوريه نفسك..كن نفسك..وليقبل بذلك الجميع

هل حد فينا جرب قبل كدا يتقمص دورة في حياته

وهل لو جربت....عجبك دورك ؟ ولا المساحه كانت صغيره وما كنش بطوله

هل بتفضل البطوله المطلقة ولا زي شخصي بتحب نكون كلنا مع بعض

ولا مش لايق عليك الدور أصلا واللي يليق عليك تروح تعمل حاجة تانية في مكان تاني مع ناس تانيه

أو لو سيبتني من التقمص خالص وقولت تعبير عجبني قوي في فيلم لأحمد حلمي

رئيس جمهورية نفسي

انك تبقي رئيس جمهورية نفسك

بعيد عن الأسوار والقيود اللي بيحطها أو تحطها أي وكل حاجه

سواء كانت اجتماعية او نفسية يعني قيود من جواك او من براك

الفكرة اللي بكلمكوا فيها بجد مش فانتزيا

بمعني انك تبص لكل حاجة في حياتك وتعيد تقيمها وتتعرف علي قيمتها عندك

هل اللي بتفكر فيه أو بتخطط ليه أو عاداتك بتاعة كل يوم من أول طبيعة أكلك لشكل نومك وصحيانك

والناس اللي حواليك وطبيعة تصرفك في الفرح والحزن

هو فعلا اللي انت عايزه ولا لقيت نفسك كدا فمشيت علي رأي حليم

حد بيوصلك لكل حاجة سواء بالإقناع او الإجبار....كلاهما وجهان لعمله واحدة

بمعني بردواا

انك يكون ليك في كل خطوة في حياتك دور أو قرار أخدته في الوقت المناسب أو مش المناسب

المهم تكون عايش في خيرك الفكري

مش عاله فكريه علي الاخرين سواء كانوا

أقارب او أغراب اساتذة او اصدقاء

في مننا ناس كتير بتعيش طول عمرها ورأي الأخرين فيهم أنهم

زي النسمه أو مطيع أو مؤدب أو مهذب لأنهم دايما بيسمعوا الكلام

يسمعوا الكلام بمعني كل حاجة عندهم مقبوله طلبات خلق الله كلهم عندهم أوامر

من أول بابا وماما واخواتي بيكلوا مربي يوماتي

مرورا بمدرسين ومدرسات المدرسة ومفيش مانع بردوا انهم كانوا قطط سيامي مع مشرفة الأتوبيس

اللي بتعني عندي أول شخصة اتمردت عليها في الحياة

وقولتلها من حقي اتكلم انا والناس واحنا مروحين بعد يوم دراسي اطول مني

كان اسمها فاتن فكراها كويس قوي ياااااااااساتر

ربنا يوفقها بقي

نرجع لموضوعنا

لو في حاجة ما عجبتكش فيك او في الدنيا

ليك الحق تمسح وتكتب من أول السطر

او تقطع الورقة وتكتب من الاول خالص

او توصل اللي عندك بالرسم او الغنا كله براحتك

الوسيله أختارها والغاية حط أساسها

ما احنا اتفقنا انك رئيس جمهورية بقي

وانتوا ادري الناس احنا اتربينا ان الريس متاح ليه كل حاجة واي حاجة وفي اي وقت

الكلام دا مجرد دعوة كي لا ننخدع بالمفروض والواجب والصح وهو كدا

ودي مش دعوه للتمرد لكنها دعوة للتفكير بجد انتي موافق عليك ولا ما فكرتش أصلا

اللي مش مسلمين لما بيفكروا كدا بيأسلموا واحنا الحمد لله مسلمين بس لو فكرنا كدا يمكن نكون مبسوتين أكتر

عاوزة اقولي وأقولكم قبل ما أمشي

اي سقف مش مقتنع بيه أهدمه بكل أدب وحاول تصنع سقف أفضل يسر عينك ويشرح صدرك

فلتكن لمسك وطابعك الخاص علي كل شيء

حط قوانين خاصة بمملكتك

قوانين ملزمة لك اولا

مهما كان من حولك ومهما تكن ظروف حياتك

ان كنا علي انفسنا قادرين فنحن علي غيرها أقدر

اتمني تلاحظوا دعوتي للتغير دون ان تخلطوا بين التغيير والتمرد الغير مسئول