بنوتي الطعمة

!قبل اي كلام عبروا البلوج التاني لو سمحتم مهم قوي رأيكم!

بنوتي الطعمه قربتي تيجي بألف سلامة

يا بنت أخويا وأختي أبوكي : أعرفك علية هو أبوكي باعتبار ما سيكون

وابن خالتي وأخويا وحبيبي باعتبار ما كان وسيكون

في الفسح مش بطال ....... ما أنا أصلي يا سوووولي مجربة

كانت تخلص امتحاناتي يشتري الشيكولاته والشيبسي والايس كريم ويجرجرني في إيد وشنطة

هدومي في ايد وعلي حضن جدتك يحدفني

شكلي شجعتك تتولدي........ اه اسفه نسيت انك ما تعرفيش يعني إيه

شيكولاته وشيبسي وأيس كريم دي الحاجات اللي إن شاء الله

هيخلص عليها مصروفك

الخلاصة أبوكي مش هتعرفيله هزار من جد

بس يا خوفي يخنق عليكي زي بعض الآبهات اللي بابايا مش منهم

اه نسيت أقولك بابايا هو عمو أحمد

اللي غالبا هيحطلك تمر في بقك ويدن بصوت حنين في ودنك أول ما تتولدي

حسسي بقي بإنك عارفاة وابقي افتكري الجمايل يا هانم

عمو أحمد قبل ما أنسي متجوز من واحدة بتحب أبوكي واخواتة

اللي هما أعمامك أكتر من أي حاجة في دنيتها

ودا مش بيخليني أغير مطلقا هههههههه

بس بصراحة عندها حق

وغالبا هي اول واحدة هتشيلك بعد الدكتور لان تيتا خوافة حبتين

بس حنان واحتواء الدنيا فيها هتحبيها قوي وهتدلعك قوي

بس حاسبي مش أكتر من أبوكي دلوعة ماما

هبقي أحكيلك نوادر عنهم توقعك من الضحك

ليكي أعمام وعمات كتير تعالي أنتي بس وأنا هبقي أعرفك عليهم

أنا من عماتك بس هتقوليلي يا خالتو

عشان أنا بحب مامتك أكتر من باباكي

من أول دخولها العيلة وهي أختي وحبيبتي وصديقتي

علي فكرة أنا أول واحدة شفتها في العيلة

رحت مع بابي وتيتا وجدو في زيارة التعارف

كنت مبسوطة قوي لما طلبوا مني إني أروح معاهم

لان أبوكي حد عزيز وغالي علي قلبي

وأنه يلاقيني جامبه في موقف زي دا

حاجة تسعدني جدا

مامي بقي يا سوووولي حكاية

زوقها في اختيار كل حاجة عالي قوي وكمان أكلها تحفة

ودودة قوي ولطيفة وطبعية وحنونه

بدخل بيتكم وكأني في مملكة خاصة بيا وهي اللي عملت دا

من أول مرة زرتكم فيها

براحة يا سلمي علي ماما أنا هموت من القلق عليها بسببك

اتولدي بقي وخلصينا وماتقلقيش من التضخم الاقتصادي كل مشكلة وليها حل

كنت لسه معاها علي التليفون من شوية

ايوة اللي انتي ندهتلها ترد عليه يالماحه

وشكتلي منك

شكلي هحبك قوي يا قردة

مشتاقة ألعبك وأغيرلك كل شوية فستان

وأنيمك في حضني وألعب في شعرك

وأذوقك البيتزا الجهنمية بتاعتي

وأنزلك البحر ومنتظرة كمان تعليقك علي البوست

هسمحلك بفرصة خمستاشر سنه بس

ودا علي ما تعرفي تفكي طلاسم الحروف والمعاني

اشتقت ليكي يا بنت اخويا و أختي وبنتي